Admin صلاح احمد عيسى
Admin
المساهمات : 150
تاريخ التسجيل : 12/11/2011
 | موضوع: المروووووق من الجنة  الثلاثاء يناير 31, 2012 8:21 am | |
| [size=24]وقفت حاجة المقام.... جنب ولدها عبد العاطي....في يوم عرفة..شمش
شديدة.... وسموم....
ترددت المقام كم مرة في ان تسال سوعال خايفة يبوظ عليها حجتها.....في
النهاية اتوكلت علي الله وقبلت علي عبد العاطي( عبد العاطي كدي اديني
اضانك).... دنقر عبد العاطي فوق امو وقالت ليهو( بدور اسعلك سوعال علا
خايفة السوعال دا يخرب علي حجتي)... طمانها عبد العاطي وقال ليها في الحج
يا يمه تسالي اي حاجة.... قالت ليهو برااااحة( يا عبد العاطي يا ولدي...
عرفة دي ما لقو حتة يدفنوها فيها علا الصقيعة دي؟....)
...اتبهط عبد العاطي وما عرف يبكي واللا يضحك...
قال لها( يا يمه.... مافي زول مدفون هنا... عرفة دا اسم الجبل دا....
ودا الجبل الاتعرف فيهو ابونا ادم علي امنا حواء...بعد ما نزلو من الجنة
.... ) قبلت عليهو وقالت ليهو( اها...وقع لي النضم.... هم اكنهم امنا
حواء وابونا ادم كل واحد نزل براهو...؟...مالهم ما تقاودو ونزلو
سوا؟)....قال لها(حكمة ربنا يا يمه.... كل واحد ينزل براهو.... عشان
يتعبو ويفتشو لي بعض وكل زول فيهم يعرف قيمة التاني).....قالت ليهو(
اللقى رفيقو منو باللوال...حواء واللا ادم؟).....قال لها( ادم لقى
حواء...) ضحكت وقالت ليهو( صح...اصلهم الرجال قاعدين يكوسو للنسوان....
علا المسنوحة مرتك رباب.... جرت وراك لمن كرعيها حفن من الجري... عشان
تعرسك)... اتلفت عليها وقال ليها( يمه...استغفري ربك انتي في الحج.....
خليها رباب حسي).... احست بالخجل شوية وقعدت تطنطن( استغفر الله من حقك
يا رباب يا بت زينب...لي عند الحج لاحقاني ودايرة تخربيهو علي؟).....حاجة
المقام مكجنة رباب مرة عبد العاطي ولدها... وشاماها شمة صح....اتذكرت
يومهم المسافرين ورباب نادت عبد العاطي بعيد ونضمت معاهو ....والمقام
دايرة تعرف رباب قالت ليهو شنو...( ات يا عبد العاطي يومنا الفي الميطار
.رباب دي كانت بتقول لك في شنو؟)...تضايق عبد العاطي واستغفر ربو وقال
لها( يمه ..ما قلت لك انتي في الحج ... استغفري الله وخليكي معاهو)...
استغفرت المقام ربها وقبلت عليهو( خلاس...علا خسمتك بالرسول بعد الحج
تحدسني رباب دي قالت لك شنو؟)....ثم برهة سكوت.... وسؤال من المقام( علا
يا عبد العاطي.... ناس ابونا ادم ديل...المرقهم من الجنة
شنو؟؟...)....يرد عبد العاطي(.... اصلو يا يمه..قالو ربنا قال ليهم اكلو
من شُدر الجنة دي زي ما دايرين علا الشدرة دي وحدد لهم شدرة معينة ربنا
قال ليهم ما تاكلو من الشدرة دي... اها امنا حواء نبحت ادم لحدي ما اكلو
منها ربنا زعل عليهم ومرقهم من الجنة).... سرحت المقام شوية ورجعت(.أكنها
امنا حواء خاتة دي؟...حرشت ادم علي الاكل من الشدرة؟....شفتّ مضرة المرا
دي وقوة راسا؟..
اها شفتّ؟... اصلو البيباري النسوان بيمرق من الجنة وسقطا.....عشان انت
تاني تسمع لي نضم رباب[/size] | |
|
