Suliman Sudani
من هنا وهناك
هيثم صديق
قلع الضفر من اللحم جد حار
وفيصل موسى فات وكرنقو طار
جمهور الهلال شاف الحصل وإحتار
ضربات الزعيم في جوفو طالقة النار
(زهانا)
الفرق ما بين ضفر و صفر نقطة
والفرق ما بين البطل و الوصيف خمسة نقاط
وضفر لاعب دولي
والصفر دولي
والضفر ما بيمرق من اللحم
والصفر ما بيمرق من الدماعة
وامس ضفر إختار الزعيم
وقع إقرارو وطلق نارو
والدماعة قالو ماشين الفيفا
ليه أدّاهم ضفر بونية؟
الضفر إتقاع
المريخ مركز تعذيب
أديكو وساكواها والدافي
أحسن ليكم (تعترفوا) إنو المريخ أحسن منكم
وشو
سوط ساكواها ينزل
شو
ولما شفناكم صامدين
جبنا الزردية
وجرينا الضفر
وإعترفتو
عندكم إعتراف
وعدمانين إحتراف
أها تاني دايرين نشيل منكم منو؟
أولو إنتو بأة!!!
لو عندكم غرامة بندفعها
عليكم الله نادي جاب الحضري من الزمالك
وقلع وارقو من الأهلي
يغلبوا ضفر من حبايبنا في النيل الحصاحيصا!!!!
نيل الحصاحيصا الحقَّار
شال من الهلال نقطتين وأدَّاهو شاكوش
ومن الأهلي شندي شلنا فيصل العجب موسى
أي فيصل في المريخ بيساوي فصيل مقاتل
بيساوي فصل في مدرسة المريخ
المريخ مدرسة
شعبها صفوة
وطعمها قهوة
قهوة لمَّة الحبَّان
قلي البن وباقي السكر في طعم الفنجان
المريخ حالة مالوجد والهيام والعنا والوله
الحب والريدة
الغشق والصبابة
الوتر في الربابة
المريخ عصابة
خلعت الأظفار وأدمت الأصابع
المريخ ضفَّارة
منكير
حنَّاء
وخالت في الضفر
مفروض الهلال يعمل إقرار لضفَّاري
أحسن يلعب جوة الملعب
بكتابته الرشيقة دي
بيكون أحسن من أوتو باروكة
ممكن بالبووووز يطلع الكورة أحسن من أتير
ومن أمس الجماعة إشتغلوا في نيل الحصاحيصا
ياا خــبــر : ضفر يوقع للمريخ
ياا خــبــر : المريخ يقلع ضفر
متذكرين تسجيل صالح عبدالله للهلال
حليل صالح وحليل الهلال
نخاف غداً أن يخرج البرير ويقول:
إنه لم يفكر في تسجيل ضفر
ويظهر عادل رجب ويقول : أنا الفكرت
أنا اللقيت البفكر في الدماعة أكرم حمَّاد بس
الباقين كلهم شغالين بالعواطف
المريخ شغال عواصف
والهلال شغال عواطف
المشكلة أنه لا أحد يحب أن يكون مع الوصيف
يعني يقولوا ليك داير تكون مع البطل وأللا مع الوصيف؟
في ناس بتختار الأدنى
لأنه متاح
لكن مع المطايب
الما قادر بيكون (ملوص)
وسنلعب ضومنة
والبلاطة عندهم على طول
...........
وغداً بحول الله إحتفالنا الكبير
بالكأس الكبير
في مهبط الكؤوس
فسيجاور الكأس كاس مانديلا
وكأسي سيكافا
بعد أن كان يشكو الوحدة
وضاربو الصقط
هنا الدفء
هنا الدافي
هنا السكوى
وكان هناك يدمن الشكوى
ولو نطق!
لو نطق لوزع الحلوى
الدعوة خاصة
لعشرات الألوف
من أهل الألف
تعالو لنرى أهل الغرض كيف يكون الحضور
*مكالمة غاضبة من كوستي من الأستاذ أحمد
تحدث عن الحكم بدرالدين عبدالقادر
كشفوا لنا هلاليته
وقسمه أن يهزم المريخ حيثما وجده
صفوة كوستي قالوا لنا ما لن ننشره
لكن نطمئنهم
الظلم ليل
والليل ولى لن يعود وجاء صباح المريخ
وبغيره لا طبخة لها طعم
وللمريخ نعم
نقولها ... وقالها النجوم
ولا عزاء لناس لا لا
الأحد نوفمبر 27, 2011 6:03 am